Kinilala ng Climate Change Commission sa pangunguna ni CCC Vice Chairperson and Executive Director Robert E.A. Borje ang mahalagang papel ng mga kooperatiba sa pagtulak ng sustainable development at epektibong climate action para sa Pilipinas.
Sa kanyang talumpati sa ginanap na 47th General Assembly and 22nd Leader’s Congress of the National Confederation of Cooperatives (NATCCO), binigyang-diin ni Borje kung paano ang mga kooperatiba ay nagpapakita ng diwa ng bayanihan na sumasalamin ng katatagan at pagkakaisa ng mga Pilipino.
Ipinunto rin nito kung paano ang mga lokal na kooperatiba partikular sa sektor ng enerhiya, agrikultura, at transportasyon ay maaaring mag-promote ng renewable sources, sustainable farming, at eco-friendly na pamamaraan ng paglalakbay na nagpapatatag sa ekonomiya ng Pilipinas.
Maliban sa pagkilala sa ambag ng mga kooperatiba, ibinahagi din ni Borje sa kanyang talumpati ang mga kasalukuyang pagsisikap ng gobyerno upang makamit ang climate resilience at sustainable development sa pamamagitan ng iba’t ibang mga plano at framework tulad ng National Adaptation Plan (NAP) na sinasabing mahalaga tulad sa mga kooperatiba upang mabigyan ang mga ito ng tulong sa pag-identify ng mga asset at financial risk sa panahon ng kalamidad at climate challenges.
Nananatili naman ang CCC sa pangako nito sa pag-mainstream ng whole-of-government and whole-of-society approach sa pagbuo ng mga estratehiya at plano kaugnay sa pagharap ng bansa sa climate crisis. | ulat ni EJ Lazaro
