Tiniyak ni House Ways and Means Chair at Albay Rep. Joey Salceda na isasama nito sa kaniyang panukalang batas ukol sa paggamit ng “blockchain” ang probisyon na nagbibigay kapangyarihan sa Bangko Sentral ng PIlipinas na suriin ang lahat ng transkasyon sa teknolohiya na may kaakibat na assets.
Sa pagdinig ng House Committee on Information ang Communications and Technology, tinalakay ang House 658 o “An Act Establishing the Basic Regulatory Framework for Blockchain Technology in the Philippines”.
Layon ng panukalang batas na magamit ang teknolohiyang “blockchain” o distribution ledger technology sa record keeping at data management system sa mga ahensya ng gobyerno gaya ng ginagawa na ngayon ng Department of Budget and Management at Bureau of Treasury.
Ayon kay Salceda, ang naturang “immutable ledger” ay transparent sa lahat at madaling ipasa dahil ito at fully automated.
Hiniling naman ni Pasig Rep. Roman Romulo sa may akda ng batas na siguruhing ang paggamit ng ‘blockchain’ ay para lamang sa information sharing at maiwasang magamit sa cryptocurrency o bitcoins.
Inaprubahan naman ng komite na bumuo ng technical working group upang i-refine ang panukalang batas na pangungunahan ni Davao 2nd District Rep. Cheeno Almario. | ulat ni Melany Valdoz-Reyes