Inaasahang sa mga susunod na araw ay magkakaroon ng pagpupulong sina bagong Senate President Francis ‘Chiz’ Escudero at House Speaker Martin Romualdez tungkol sa magiging relasyon ng Senado at Kamara sa ilalim ng bagong senate leadership.
Kabilang sa inaasahang mapag-uusapan sa magiging pagpupulong na ito ay ang isinusulong na pag-amyenda sa economic provision ng Saligang Batas o economic charter change.
Una nang sinabi ng liderato ng Kamara na umaasa silang sa ilalim ng pamumuno ni Escudero ay uusad na ang cha-cha.
Gayunpaman, kilalang tutol sa cha-cha ang bagong upong lider ng Senado.
Sa pulong balitaan sa Senado ngayong araw, natanong si Escudero kung ano ang makapagpapabago ng isip niya tungkol sa cha-cha.
Tugon ng senador, dapat lang matiyak na hindi maaapektuhan ang kapangyarihan at prerogative ng Mataas na Kapulungan.
Dapat rin aniyang magkaroon ng garantiya na hiwalay ang magiging pagboto ng Kamara at Senado sa isusulong na cha-cha. | ulat ni Nimfa Asuncion