May alok na libreng serbisyo ang Light Rail Transit Authority (LRTA) ngayong Father’s Day, Hunyo 16.
Bilang pakikiisa sa pagdiriwang ng Father’s Day, may handog ang LRT 2 ng libreng blood pressure monitoring, blood sugar testing, haircut at massage para sa mga tatay at mga tumatayong ama.
Ayon kay LRTA Administrator Hernando Cabrera,katuwang ng LRTA ang Philippine Red Cross-Marikina Chapter sa pagbibigay ng munting regalo para sa kanila.
Isang simpleng paraan ito para kilalanin at bigyang pugay ang mahahalagang papel at sakripisyo ng mga tatay sa kanilang mga pamilya at lipunan.
Sinimulan ang mga libreng serbisyo mula alas-8:00 ng umaga hanggang alas-12:00 ng tanghali sa Araneta Center-Cubao Station at Antipolo Station. | ulat ni Rey Ferrer