Pormal nang inihain ng Philippine National Police-Integrity Monitoring and Enforcement Group (IMEG) ang reklamo laban sa tatlong pulis na sangkot sa pambubugbog sa kapwa nila pulis sa lalawigan ng Isabela.
Ayon kay IMEG Director, PBGen. Warren De Leon, naisampa na nila sa Isabela Provincial Prosecutors Office ang reklamong paglabag sa Anti-hazing law laban sa tatlong pulis.
Sakaling mapatunayang nagkasala, sinabi ni De Leon na maaaring makulong ang tatlong pulis ng hanggang 30 taon at pagmumultahin pa ng tig-2 milyong piso bawat isa.
Kasabay nito, sinabi rin ni De Leon na gumugulong na rin ang pre-charge investigation para sa kasong administratibo ng mga sangkot na pulis.
Kasalukuyang nasa Personnel Holding and Accounting Unit (PHAU) ng Police Regional Office 2 sa Camp Adduru ang tatlong mga pulis. | ulat ni Jaymark Dagala