Hawak na ngayon ng National Bureau of Investigation ang tatlong suspek na sangkot sa pag-hack sa mga Facebook account at websites ng ilang mga pribadong institusyon gaya ng mga bangko at government agencies.
Ayon sa NBI, ang mga hacker na ito ay gumagamit ng mga alyas na Kangkong, Mirasol, Sibat, Ricardo Redoble, at Lulu sa kanilang mga operasyon at mga parte ng dalawang malalaking hacking groups sa bansa: ang Philippine Lulzec at Globalzec.
Sa tulong ng isang informant, naaresto sa isang hot pursuit noong June 17 ang mga suspek na kinilalang sina alyas Niel, alyas Christian at isang kinilalang si alyas Allan 10k.
Nakumpiska naman sa mga ito ang isang cellphone na may lamang scripts at databases ng mga LGU at iba pang government websites gayundin ang mga datos na may kaugnayan sa ilang na-hack na bangko gaya ng Philippine National Bank, Security Bank, Banco de Oro, at Union Bank.
Mahaharap ngayon ang mga suspek sa Illegal Access under Section 4(a)(1) at Misuse of Device under Section 5(iii) ng RA 10175 o ang Cybercrime Prevention Act of 2012, at Unauthorized Access o Intentional Breach under Section 29 ng RA 10173 o ang Data Privacy Act of 2012. | ulat ni Merry Ann Bastasa