May alok na libreng sakay ang MRT-3 sa mga marino ngayong araw, June 25, bilang pakikiisa sa taunang pagdiriwang ng Day of the Filipino Seafarer.
Ayon kay Transportation Assistant Secretary for Railways at MRT-3 Officer-in-Charge Jorjette Aquino, ang libreng sakay ay pagbibigay pugay sa sakripisyo ng mga marino at pagkilala sa malaking kontribusyon ng mga ito sa ekonomiya ng bansa.
Maaaring ma-avail ang free ride sa buong oras ng operasyon ng MRT-3.
Kailangan lamang magpakita ang mga ito ng Seafarer’s Identification and Record Book (SIRB) o PRC ID sa ticket seller o security personnel ng mga istasyon.
Ang unang biyahe ng tren sa North Avenue Station ay 4:30 a.m. at 5:05 am naman sa Taft Avenue Station. Samantala, ang huling biyahe sa North Avenue Station ay bandang 9:30 p.m. at 10:09 p.m. naman sa Taft Avenue Station. | ulat ni Merry Ann Bastasa
