Siniguro ni Speaker Martin Romualdez na kanilang tatapusin ang nalalabing tatlo sa dalawampu’t walong tinukoy na LEDAC priority bills bago tuluyang magsara ang ika-19 Kongreso sa susunod na taon.
Ito ang sinabi ng House leader kasunod ng naging LEDAC meeting na pinangunahan mismo ni Pangulong Ferdinand R. Marcos Jr. sa Malacañang.
Ang tatlong panukala na ito ay ang amyenda sa Foreign Investors’ Long-Term Lease Act, amyenda sa Agrarian Reform Law (for Committee Deliberations) at amyenda sa EPIRA (under Technical Working Group/Committee Deliberations).
Limang bagong panukalang batas din ang idinagdag sa LEDAC kaya naman mula sa 59 ay umakyat na sa kabuuang 64 priority LEDAC measures.
Kabilang dito ang 1. Amyenda sa Foreign Investors’ Long-Term Lease Act (No Bill Filed), 2. Amyenda sa Agrarian Reform Law (For Committee Deliberations), 3. Archipelagic Sea Lanes Act (3rd Reading), 4. Reporma sa Philippine Capital Markets (3rd reading), at 5. Amyenda sa Rice Tariffication Law (RTL) (3rd reading).
“Most of the bills (25) are already in their final stages and approved by the House of Representatives. We are committed to approving the remaining three of the twenty-eight measures named during our LEDAC meeting with President Bongbong Marcos, Senate President Chiz Escudero, and other officials. These legislative measures are crucial to the country’s development agenda,” sabi ni Speaker Romualdez
Ayon kay Romualdez, binigyang diin ng Pangulong Marcos na mahalagang maaprubahan ang naturang mga panukala na makatutulong sa pag-unlad ng bansa at upang matugunan ang mga mahahalagang hamong hinaharap ng bansa.
“The President has emphasized the importance of passing these measures to advance the policies of the Marcos administration for the country’s continued economic recovery, progress, and stability of our nation,” sabi ni Speaker Romualdez
Positibo rin si Romualdez na makakamit ito dahil sa pinaigting na ugnayan at relasyon ng Kamara at Senado sa pamumuno ng bagong Senate President Chiz Escudero.| ulat ni Kathleen Forbes
