Nilagdaan ng Light Rail Manila Corporation (LRMC), Sumitomo Corporation, at Hankyu Corporation ang kasunduan para sa technical assistance sa operasyon at pagpapanatili ng sistema ng LRT-1.
Sinaksihan nina Transportation Secretary Jaime Bautista at mga opisyal ng Japan International Cooperation Agency (JICA) ang paglagda sa kasunduan.
Sa ilalim ng kasunduan, magbibigay ang Hankyu Corp. ng technical assistance sa LRMC upang makatulong sa pagsusuri ng mga operasyon ng LRT-1 at mapabuti ang mga proseso at pagsasanay ng mga tauhan nito.
Ayon kay Secretary Baustista, ang karagdagang tulong na ito ay magiging lubhang kapaki-pakinabang lalo na at malapit nang magsimula ang partial operation ng Cavite Extension.
Sa panig naman ni Hankyu Corporation Senior Managing Director Masayoshi Uemora sinabi nito, na ang pagtatayo ng mga sistema ng riles sa Pilipinas ay napakahalaga upang mabawasan ang pagsisikip ng trapiko.
Umaasa naman ang DOTr, na ang naturang kasunduan ay makahihikayat sa mga Japanese firm na mamuhunan sa mga sistema ng pampublikong transportasyon sa bansa. | ulat ni Diane Lear
