Ibinahagi ni Pangulong Ferdinand R. Marcos Jr. sa kaniyang talumpati nitong Biyernes, Hulyo 5, na umabot sa mahigit ₱27-bilyong halaga ng proyekto ang isinusulong ng Department of Agrarian Reform (DAR) sa buong rehiyon ng Northern Mindanao.
Nakapaloob dito ang mga imprastraktura tulad ng farm-to-market roads, mga irrigation system, at mga potable water system na mapapakinabangan ng 524 na mga agrarian reform beneficiaries organizations (ARBOs) sa rehiyon.
Batay sa ulat ng Pangulo, umabot na sa 21 proyekto ang nasimulan sa lalawigan ng Bukidnon at Camiguin.
Ayon pa sa Pangulo, iilan lamang ito sa mga hakbang na ginagawa ng pamahalaan upang matiyak na mayroong sapat na pagkain ang sambayanang Pilipino.
Sinisiguro naman ng Pangulo na pag-iibayuhin pa ng pamahalaan ang kaginhawaan sa mga magigiting na magsasaka sa bansa.| ulat ni Sharif Timhar| RP1 Iligan