Muling bumida ang mga produkto ng mga Micro Small and Medium-sized Enterprises (MSMEs) mula sa iba’t ibang bahagi ng Pangasinan sa isinasagawang KADIWA ng Pangulo sa Dagupan City, Pangasinan na nagsimula kahapon, ika-06 Hulyo hanggang ngayong araw, ika-07 Hulyo, 2024.
Sa naunang panayam kay Dagupan City Mayor Belen Fernandez, suporta ito sa programa ni Pangulong Ferdinand Marcos Jr. na KADIWA ng Pangulo. Dagdag ng Alkalde, buwanan rin umano itong isinasagawa sa lungsod bilang suporta sa mga maliliit na negosyo.
Hatid ng kaganapan ang iba’t ibang produkto ng mga Micro Small and Medium-sized Enterprises (MSMEs) at mga ani ng mga lokal na magsasaka. Mabibili sa Farmers Day Caravan ang mga sariwang prutas, gulay, Dagupan Certified Bangus Products, at mga pagkain na matatagpuan sa Rehiyon Uno.
Patuloy naman na hinihikayat ni Dagupan City Mayor Belen Fernandez ang mga Dagupeño na tangkilin ang mga produktong hatid ng kadiwa.
Isinusulong ng programa ang farm-to-market na pamamaraan ng pagbebenta kung saan mas malaki ang maaaring kitain ng mga lokal na magsasaka. Dagdag dito, bahagi rin ito ng eight-point socioeconomic agenda ni Pangulong Marcos Jr. upang masigurado ang food security, agricultural productivity at mas mataas na kita ng mga magsasaka.| ulat ni Ricky Casipit| RP1 Dagupan