Nagpahayag ng suporta si Senate President Francis “Chiz” Escudero sa pagkakapirma ng reciprocal access pact sa pagitan ng Pilipinas at Japan.
Ayon kay Escudero, suportado niya ang anumang kasunduan na magpapalakas at magpapataas ng kakayahan ng ating militar.
Sinabi naman ni Senador Juan Miguel Zubiri, na napapanahon ang kasunduang ito at mapapataas nito ang defense operability ng ating bansa sa mga kaibigan natin sa Asya.
Ayon kay Zubiri, sa pamamagitan ng kasunduang ito ay mapapalakas ang naval training ng Pilipinas at magagamit ng husto ang mga sasakyang pandagat, at iba pang kagamitan na binili mula sa Japan.
Binigyang diin rin ni Zubiri, na isang mahalagang kaalyado ng Pilipinas ang Japan, at ang kanilang tulong ay mahalaga sa modernisasyon ng Philippine Navy at Philippine Coast Guard.
Umaasa rin ang senador, na sa pamamagitan ng partnership na ito ay mas makakamit ang kapayapaan sa rehiyon. | ulat ni Nimfa Asuncion
