Pinaigting ng PNP Criminal Investigation and Detection Group (CIDG) ang kanilang Anti-Criminality Operations alinsunod sa direktiba ni PNP Chief Police General Benjamin Acorda Jr.
Iniulat ni CIDG Director Police Brig. Gen. Romeo Caramat na mula Abril 25 hanggang Abril 30, naglunsad ang CIDG ng 527 operasyon sa iba’t ibang panig ng bansa.
Kabilang aniya sa mga naaresto sa pagpapatupad ng Oplan Pagtugis ang 49 na Regional, 43 provincial, at 40 Municipal at City level Most Wanted Persons (MWP), at 238 na Other Wanted Persons (OWPs).
Sa kampanya naman laban sa loose firearms o Oplan Paglalansag Omega, 88 ang naaresto at 114 baril, limang pampasabog, at samu’t saring mga bala ang narekober.
Habang naaresto naman ang 19 na economic saboteurs, 14 na environmental law violators, 7 petroleum smuggler, at 63 iba pang suspek sa iba’t ibang law enforcement operations.
Ayon kay Caramat, ito ay testamento sa suporta ng CIDG sa adhikain ng PNP Chief at ng pambansang liderato na gawing maayos at ligtas ang mga komunidad para sa mga mamayan. | ulat ni Leo Sarne
