Hinihintay pa ng Department of National Defense (DND) ang detalyadong ulat mula sa Department of Foreign Affairs (DFA) hinggil sa naging kasunduan sa pagitan ng Pilipinas at China.
Ito’y may kaugnayan sa pagsasagawa ng Rotation & Re-supply (RoRe) mission sa mga sundalong nakahimpil sa nakasadsad na BRP Sierra Madre sa Ayungin Shoal.
Sa panayam ng Defense Press Corps (DPC) kay Defense Spokesperson, Director Arsenio Andolong, may mga bagay silang nais munang linawin sa DFA hinggil dito.
Gayunman, sinabi ni Andolong na ipinauubaya na nila sa National Maritime Council ang anumang komento tungkol sa usapin dahil ito ang may poder hinggil dito.
Giit pa ni Andolong, iisa lamang ang layunin ng mga nasabing pag-uusap at ito ay para pahupain ang tensyon sa pagitan ng dalawang bansa upang panatilihin ang kapayapaan at katatagan sa rehiyon.
Bagay na binigyang-diin naman mismo ni Pangulong Ferdinand R. Marcos Jr. sa kaniyang ikatlong State of the Nation Address (SONA) kahapon. | ulat ni Jaymark Dagala
