Patuloy ang pamamahagi ng tulong ng Department of Social Welfare and Development (DSWD) sa mga lugar na naapektuhan ng bagyong Carina at habagat sa bansa.
Ayon sa DSWD, as of July 29, aabot na sa 977,560 na family food packs ang nailaan nito sa NCR, at mga rehiyon ng Central Luzon, CALABARZON, MIMAROPA, at Bicol.
Nangunguna ang Region 3 sa may pinakamalaking natanggap na food packs na umabot na sa 422,116.
Patuloy namang nakikipag-ugnayan ang kagawaran sa mga lokal na pamahalaan para agarang maihatid ang nararapat na tulong para sa mga naapektuhang komunidad.
Kaugnay nito, malaki pa rin ang bilang ng mga pamilyang nananatili sa evacuation center bunsod ng bagyong Carina at habagat.
Sa huling tala ng DSWD, nasa halos 14,000 pamilya pa o katumbas ng 53,691 indibidwal ang pansamantala pa ring nanunuluyan sa higit 300 evacuation centers sa bansa. | ulat ni Merry Ann Bastasa
