Kasunod ng ilang araw na official visit ni Pangulong Ferdinand R. Marcos Jr. sa Washington ay tiniyak nitong may kaukulang team na tututok sa mga napagkasunduang kooperasyon sa pagitan ng Pilipinas at ng Estados Unidos.
Sa post-visit statement ng Presidente, sinabi nitong makatutulong ang mga kooperasyong napagkasunduan para sa advancement ng key priorities ng bansa.
Ito ay tumutukoy sa agriculture and food security, energy security, pagpapalakas ng connectivity at digitalization gayundin ang may kinalaman sa climate change mitigation and adaptation.
Kasama rin sa patututukan ng Pangulo ang mga investment support na aniya’y makatutulong sa economic recovery effort ng bansa, at mas makapagpapatatag sa pundasyon ng economic environment.
Babalik sa bansa ang Pangulo bitbit ang $1.3 billion dollar investment pledges na makapagbibigay ng 6,700 na mga bagong trabaho sa mga Pilipino. | ulat ni Alvin Baltazar