Bagaman inaasahan ang posibleng mas mataas ang July Inflation sa target range ng economic managers, nagpahiwatig si Bangko Sentral ng Pilipinas (BSP) Governor Eli Remolona Jr. na maaring tuloy pa rin umano ang planong policy rate cut ngayong buwan ng Agosto.
Sa panayam kay Remolona, sinabi nito na may posibilidad na sa August 15 ang pagbabawas ng 25-bps point sa interest habang isa pang 25 bps point sa huling bahagi ng taon.
Ginawa ni Remolona ang pahayag sa gitna ng pagtaya na mas mataas na inflation rate sa pagitan ng 4% to 4.8% para sa buwan ng July, mas mataas ito sa 3%-4% inflation target ng Development Budget Coordination Committee (DBCC).
Kumpiyansa naman ang BSP chief na hindi maaapektuhan ng bagyong Carina ang July inflation rate dahilan kadalasan ang aggregate Consumer Price Index (CPI) basket ay nararamdaman sa mga susunod na buwan.
Umaasa si Remolona na ang mababang taripa sa imported na bagay at second quarter GDP ay magdudulot ng mas mabagal na inflation upang makatulong sa pagbaba ng monetary policy. | ulat ni Melany Valdoz Reyes
