Napag-alaman ni Senador Sherwin Gatchalian na peke ang isinumiteng Baptismal Certificate ng mga kapatid ni suspended Mayor Alice Guo na sina Seimen at Wesley.
Ang mga Baptismal Certificate na ito ang isa sa mga basehan kaya naibigay ang late registration of birth ng dalawa.
Sa naging pagdinig ng Senate Blue Ribbon Committee, sinabi ni Gatchalian na bineripika nila sa San Roque Parish Church sa Caloocan ang isinumiteng Baptismal Certificate nina Seimen at Wesley sa Philippine Statistics authority (PSA).
Sa pamamagitan ng isang liham, tumugon naman ang Parochial vicar ng Caloocan na si Fr. Leo Pepito at sinabing wala silang nakitang anumang baptismal record ng mga ito.
Sinabi din ng senador na personal pang nakipag-usap ang kanyang staff sa parish priest ng naturang simbahan para makasiguro.
Ibig sabihin nito, ayon kay Gatchalian, peke ang isinumiteng Baptismal Certificate ng magkapatid.
Hinikayat naman ng mambabatas ang Caloocan LGU na pahintulutan ang Philippine Statistics Authority (PSA) na gawin ang kanilang imbestigasyon para maisiwalat ang katotohanan tungkol sa pamilya Guo. | ulat ni Nimfa Mae Asuncion
