Binahagi ni Senate Committee on Women Chairperson Senadora Risa Hontiveros na posibleng nakalabas na ng Pilipinas si dismissed Bamban, Tarlac Mayor Alice Guo.
Sa manifestation sa Senate plenary ngayong araw, sinabi ni Hontiveros na nakatanggap siya ng impormasyon na lumabas ng Pilipinas si Guo noong July 18, 2024 patungong Kuala Lumpur, Malaysia.
Gamit aniya nito sa paglabas ng bansa ang kanyang philippine passport.
Sa isa pang source ng senadora, napag-alamang tumuloy pa ng Singapore si Guo at doon niya kinatagpo ang kanyang mga magulang na sina Lin Wen Yi at Guo Jian Zhing na umalis naman ng china noong July 28, 2024.
Nakasama rin nika doon ang kapatid ni Guo na si Wesley Guo at si Cassandra Ong.
Kaugnay nito, nais malaman ni Hontiveros kung sinong opisyal ng pamahalaan na posibleng tumulong kay Guo na makalabas ng Pilipinas.
Ito lalo pa aniya’t nangako ang Bureau of Immigration sa Senado na hindi nila hahayaang makapuslit si Guo.| ulat ni Nimfa Asuncion