Naging matagumpay ang Bagong Pilipinas Serbisyo Fair (BpSF) sa paglalapit ng iba’t ibang serbisyong publiko sa mga Pilipino, lalo na iyong mga nasa malalayong bahagi ng bansa.
“Ang BPSF ay naging simbolo ng ating pagbibigay serbisyo sa ating mga kababayan, lalong-lalo na ‘yung mga nasa malalayong lugar ng bansa na kung minsan hindi nararamdaman ang tulong at serbisyo ng pamahalaan.” —Pangulong Marcos.
Ayon kay Pangulo Ferdinand R. Marcos Jr. dahil isinapuso at ginusto ng mga nakibahaging probinsya at lokal na pamahalaan ang programang ito, napabilis at napalawak ng gobyerno ang paglilingkod sa mga Pilipino.
“Ito rin ay kumakatawan sa pagkakaisa ng iba’t-ibang ahensya ng gobyerno at ng lokal na pamahalaan. Sa ilalim nito, tayo ay nagtutulungan upang mailapit ang [mga] serbisyo sa taumbayan.” —Pangulong Marcos.
Nagpasalamat si Pangulong Marcos sa mga lingkod bayan na kahit nakabilad sa araw o nauulanan, ay tuloy pa rin sa paglilingkod maiabot lamang ang serbisyo sa publiko.
“Kaya nating baguhin, pabilisin, at ilapit sa mga mamamayan ang serbisyo ng pamahalaan. Sabi nga nila, basta’t gugustuhin natin, mahahanapan natin ng paraan.” —Pangulong Marcos.
Sabi ng Pangulo, sana ay magpatuloy ito pa ito.
“Sana ay mapanatili natin ang walang-sawang paglilingkod at bigyang halaga ang tiwala sa atin ng taumbayan. Sa ating mga kababayan, para sa inyo po ang Bagong Pilipinas Serbisyo Fair. Nawa po, sa pamamagitan ng BPSF ay nakatulong kami upang makabuti sa inyong mga kabuhayan.” —Pangulong Marcos.
Sa loob lamang ng isang taon, nasa 21 probinsya na ang napuntahan ng BPSF kung saan nakapag-bigay na ng bakuna, permit, birth certificate; Nakatulong sa SSS, loan, PhilHealth application, rehistro ng lisensya, pasaporte, at marami pang ibang serbisyo ang nai-lapit sa publiko.
“Patunay lamang ito na marami tayong magagawa para sa bayan basta’t tayo’y nagkakaisa.” —Pangulong Marcos.
Sabi ni Pangulong Marcos, palalawakin pa ang programang ito sa iba pang bahagi ng Pilipinas.
“Sa katunayan ang ilang mga lalawigan na ating nabisita ay nagsasagawa ng kanilang sarili na tinatawag na ngayon na Mini BPSF. Bukod sa mga napuntahan na, sasadyain pa natin ang animnapu’t-isang probinsya sa bansa. At dahil nakita natin ang kahalagahan ng programang ito, layon din nating magtayo ng Bagong Pilipinas Serbisyo Center sa ilang mga lalawigan para sa tuloy-tuloy na pagproseso ng mga pangangailangan ng ating mga residente.” —Pangulong Marcos.| ulat ni Racquel Bayan