Hindi na ikinagulat ng mga senador ang naging findings ng National Bureau of Investigation (NBI) kaugnay sa hindi magkatugma na pirma ni dating Mayor Alice Guo at sa pirmang nasa counter affidavit nito.
Ayon kay Senate Committee on Women Chairperson Senador Risa Hontiveros, professional scam artist si Guo at nakabase ang buong pagkatao nito sa kasinungalingan.
Dagdag lang aniya ito sa patong-patong nang kasinungalingan ng dating alkalde.
Pero maliban kay Guo, mananagot rin dito ang kanyang abogado na una nang nanindigan sa pagdinig ng Senado na pirmado na ang counter affidavit bago pa man lumabas ng bansa si Guo.
Inasahan na rin ni Senador Joel Villanueva na hindi totoo ang pirma sa counter affidavit ni dating Mayor Alice.
Giit ni Villanueva, ano pa ba ang aasahan sa mga kriminal na nagsisinungaling na mula pa umpisa.
Nanindigan rin ang senador na panahon nang panagutin sa batas si Guo at lahat ng mga kasabwat niya. | ulat ni Nimfa Mae Asuncion
