Handa na ang Commission on Elections-National Capital Region (COMELEC-NCR) para sa pagtanggap ng Certificates of Candidacy (COC) ng mga tatakbo sa pagka-kongresista.
Maaga pa lamang, mala-fiesta na ang sitwasyon dahil sa mga pakulo ng mga tagasuporta ng ilang kandidato sa kabila ng pabago-bagong lagay ng panahon.
Alas-8 ng umaga nagsimula ang filing ng COC at tatagal ito hanggang alas-5 ng hapon simula ngayong araw hanggang sa susunod na Martes, October 8.
Bagaman maaliwalas na panahon ang bumungad sa mga supporter ng ilang kakandidato, manaka-nakang bumuhos ang malakas na ulan.
Dahil naman sa pagdagsa ng mga tagasuporta ng mga nais kumandidato sa Kongreso, nagdulot naman ito ng mabigat na daloy ng trapiko. | ulat ni Jaymark Dagala
