Nakatakdang magpulong sa susunod na linggo ang komiteng nangangasiwa sa pagpapatupad ng gun ban gayundin ng iba pang usaping pangseguridad para sa 2025 Mid-Term Elections.
Ito’y para talakayin ang mga kinakailangang adjustment para sa pagpapatupad ng gun ban sa pagsisimula ng election period na nakatakda sa Enero ng susunod na taon.
Kasabay nito, sinabi ni Philippine National Police (PNP) Public Information Office Chief, PCol. Jean Fajardo na matapos ang filing ng Certificates of Candidacy (CoC) sa October 8, sisimulan na rin ang proseso sa pagbawi ng security detail ng mga kandidato.
Ililipat na rin ng assignment ang mga pulis na matutukoy na may kamag-anak na tatakbo sa kanilang kasalukuyang destino upang maiwasan ang pagkakaroon ng impluwensya.
Pagaganahin din ng PNP, katuwang ang Armed Forces of the Philippines (AFP) ang Joint Peace and Security Coordinating Center na siyang tutukoy kung may pangangailangan sa isang kandidato na mabigyan ng protective security. | ulat ni Jaymark Dagala
