Sanib-puwersang ipinadala ng Amerika at Pilipinas ang tulong para sa mga nasalanta ng bagyong Julian sa lalawigan ng Batanes.
Batay sa ulat ng Armed Forces of the Philippines (AFP), aabot sa pito at kalahating toneladang essential supplies ang isinakay sa C-130 plane ng Philippine Air Force (PAF) mula Villamor Airbase sa Pasay City patungong Basco.
Katuwang ng Pilipinas ang dalawa pang C-130J aircraft ng US Marines na naghatid din ng mga supply patungong Laoag Airport na siya namang nagsilbing staging point bago ipinagpatuloy ng PAF ang kanilang misyon.
Kabilang sa mga ipinahatid na tulong ay mga bigas, inuming tubig at mga de latang pagkain na mula sa Department of Social Welfare and Development (DSWD), USAID at pribadong sektor na siyang pinakakailangan ng mga apektado ng bagyo.
Ang magkatuwang na hakbang na ito ng Pilipinas at Amerika ay patunay ng matibay na alyansa at suporta ng dalawang bansa na maihatid sa lalong madaling panahon ang mga pangangailangan ng mga sinalanta ng kalamidad. | ulat ni Jaymark Dagala
