Nanindigan ang suspected drug lord na si Kerwin Espinosa na walang halong politika ang kaniyang pagharap sa Quad Committee laban sa extra judicial killings (EJK).
Nausisa kasi ni Quad Committee co-chair Dan Fernandez si Espinosa kung ano ang nag-udyok sa kaniya na tumestigo laban sa EJK.
Hindi kasi aniya maisasantabi na makwestyon nilang mga mambabatas kung bakit biglang lumabas si Espinosa na tumatakbo bilang alkalde ng Albuera Leyte.
Ani Espinosa, hustisya para sa ama ang kaniyang dahilan at handa rin aniya siyang talikuran ang politika.
Katunayan, kung kailangan ay babawiin niya ang kaniyang kadidatura upang mailabas ang katotohanan sa likod ng pagkamatay ng kaniyang ama na si dating Albuera Mayor Rolando Espinosa.
“What is your priority? Running as a mayor or seeking the truth for your father?” tanong ni Fernandez
Sagot ni Espinosa, “Hustisya po para sa Papa ko, kaya kong talikuran ‘yang pulitika.
Pagpapatuloy ni Fernandez, “So in other words in seeking the truth, and to prioritize in finding out the truth about the death of your father, you’re willing not to run anymore.”
“Yes po…I am willing to withdraw.” pagtiyak ni Espinosa
Nagdesisyon din siyang lumutang sa Quad Comm dahil napanood niyang marami nang nagsasalita na biktima ng EJK sa mga pagdinig. | ulat ni Kathleen Forbes
