Binigyang-diin ni Defense Secretary Gilberto Teodoro, Jr. ang pangangailangan ng pagkakaroon ng gender-responsive at inclusive na disaster risk reduction system upang masigurong walang maiiwan, lalo na sa vulnerable sector.
Sa kanyang talumpati sa Asia-Pacific Ministerial Conference on Disaster Risk Reduction 2024 sa PICC, sinabi ni Secretary Teodoro na may ilang sektor kabilang ang mga kababaihan, partikular na ang mga buntis, mga bata, matatanda, may mga kapansanan, at mga katutubo ang higit na naaapektuhan ng mga kalamidad.
Dahil dito, mahalaga aniyang tiyakin na ang mga programa ng pamahalaan sa disaster risk reduction ay nakatuon sa mga pangangailangan ng nasabing sektor.
Kasama sa mga hakbang ng pamahalaan ang pagbibigay ng suporta sa mga lokal na pamahalaan sa pamamagitan ng capacity building.
Sa ganitong paraan, magiging mas epektibo aniya ang pagtugon ng mga LGU at ahensya ng pamahalaan sa iba’t ibang komunidad, batay sa kanilang pangangailangan.
Binanggit din ni Teodoro ang patuloy na pakikipagtulungan ng pamahalaan sa mga civil society organization at pribadong sektor upang makabuo ng mga plano sa disaster risk reduction, kabilang ang mga kinakailangang hakbang para sa kaligtasan ng ating mga kababayan kabilang ang vulnerable sector. | ulat ni Diane Lear
