Naka-antabay na ang nasa dalawang milyong volunteers ng Philippine Red Cross (PRC) sa buong bansa upang rumesponde sa mga lugar na labis na maaapektuhan ng bagyong Kristine.
Maliban dito, sinabi ni PRC Chairperson at dating Senador Richard Gordon na handa na ring i-deploy ang mga kagamitan para sa Disaster Response sa may 102 nilang chapters.
Kabilang na rito ay ang kanilang rescue vehicles, food trucks, water tankers, at ambulansya na gagamitin para sa pagtugon.
Nagtayo na rin ng welfare desk ang Red Cross sa Negros Occidental gayundin ng first aid stations at health desk na ilalagay naman sa mga susunod na araw.
Kasunod nito, hinikayat ni Gordon ang publiko na ihanda ang kanilang “Go Bag” na naglalaman ng mga damit, gamot, hygiene items, flashlight, maliit na radyo, whistle, at makakain na tatagal hanggang tatlong araw, at iba pa. | ulat ni Jaymark Dagala
