Pinaalalahanan ng Bureau of Internal Revenue ang mga taxpayer na kumuha lang ng isang Tax Identification Number (TIN).
Sinabi ni BIR Commissioner Romeo Lumagui Jr., ang sinumang indibidwal na nakakuha ng higit sa isang TIN ay lumalabag sa National Internal Revenue Code.
May katapat umano itong multa na Php1,000 o pagkakulong ng hindi hihigit sa anim (6) na buwan o pareho.
Sinabi pa ni Lumagui na bukod sa criminal liability, mahihirapan din ang mga indibidwal na may higit isang TIN sa kanilang mga transaksyong pinansyal, tulad ng pagbukas ng bank account o pag-aaplay para sa isang pautang.
Maaari ding magdulot ito ng kalituhan at mga pagkakamali sa paghahain ng mga tax return.
Payo ng BIR Chief, kapag hindi sinasadyang nakakuha ng maraming TIN, kinakailangan lamang na mag-request ng cancellation para mabalewala ang iba. | ulat ni Rey Ferrer
