Naaresto ng mga tauhan ng Civil Security Group (CSG) ang dalawang suspek na namemeke ng lisensya ng baril.
Sa pulong balitaan sa Camp Crame, iprinisinta ni CSG Director PBGen. Benjamin Silo Jr. ang mga suspek na kinilalang sina: Vicky Genabe, 38; at Isidro Pagaduan, 37.
Nahuli ang dalawa nitong April 11, 2023 sa Sta. Cruz, Maynila sa operasyong inilunsad base sa intelligence report na natanggap ng CSG tungkol sa iligal na aktibidad ng mga suspek.
Sinisingil umano ng mga suspek ang kanilang mga kliyente ng 1,500 piso kada lisensya, na maari nilang makuha sa loob lang ng dalawang oras.
Nakuha mula sa mga suspek ang 1 computer set kasama ang printer, 3 pekeng ID at PVC cutter na umano’y ginagamit sa paggawa ng pekeng lisensya ng baril.
Ang mga suspek ay kakasuhan ng paglabag sa Article 172 ng Revised Penal Code o Falsification by Private Individual and use of Falsified Document. | ulat ni Leo Sarne
