Kasunod ng matagumpay na partnership noong nakaraang taon, tatlong Agrarian Reform Beneficiary Organizations ang muling pumirma ng kanilang kontrata sa Bureau of Jail Management and Penology.
Ito ay para magsuplay ng masustansyang pagkain sa BJMP sa ilalim ng programang Enhanced Partnership Against Hunger and Poverty .
Ang mga kontrata ay nilagdaan sa pagitan ng Association of Women and Men of Gabawan sa Daraga, South Quinale Irrigators, Association sa Libon, Panganiran Irrigators, Association sa Pio Duran, at ng BJMP.
Ayon sa Department of Agrarian Reform, may siyam na jail dormitory ang susuplayan ng mga sariwang gulay at prutas, mga poultry products gaya ng gatas, itlog at manok.
Kabilang dito ang Tabaco City District Jail, Sto. Domingo District Jail, Legazpi City Jail, Camalig District Jail, Guinobatan Municipal Jail, Ligao City Jail, Oas Municipal Jail, Pio Duran Municipal Jail, at Polangui District Jail.
Sinabi ni Maria Eugenia Alteza, Albay Agrarian Reform Chief, ito na ang ikatlong taon ng partnership ng tatlong ARBO at ng BJMP mula nang ipatupad noong Abril 2021.
Sa unang kontrata kumita ang mga ARBO ng Php 32,992 at sa sumunod na kontrata ay nakaipon sila ng kita na abot sa Php 367,597. | ulat ni Rey Ferrer
: DAR
