Gagamit ng makabagong teknolohiya ang Philippine National Police (PNP) para sa “Marksmanship Training” o ang tamang paggamit ng baril ng mga Pulis.
Ito ang inihayag ni PNP Training Service Director, Police Colonel Radel Ramos, makaraang ipakita sa media kanina ang kanilang gun simulator na nagbuhat pa sa Amerika.
Paliwanag niya, sa paggamit ng gun simulator mas mahahasa ang kakayahan ng mga pulis sa paggamit ng baril at makatitipid ng pondo rito ang PNP sa pagbili ng bala.
Aniya, mas magiging madali ang paggamit nito lalo pa at taon-taon sumasalang ang mga pulis sa “proficiency test.”
Sa gun simulator, nabibigyan ng “realistic scenario” ang mga pulis na bumabaril na halos kapareho lang din sa firing range.
Bagaman, totoong baril ang kanilang ginagamit wala itong bala at sa halip ay kinakabitan lamang ng laser para sa pag-asinta sa virtual target.
Aabot sa P6 milyong ang ginastos ng PNP Training Service para sa nasabing kagamitan, na kasalukuyan pa lamang nasa Kampo Crame subalit balak nang gawin din ito sa iba pang mga kampo sa bansa. | ulat ni Leo Sarne
((?: PNP-PIO))
