Iniulat ng Police Regional Office (PRO) MIMAROPA na 15 ang sugatan sa naganap na pagsabog ngayong 10:20 ng umaga sa Mr. Won’s Samgyeopsal Korean restaurant sa Xentro Mall Brgy. Lumangbayan, Calapan City, Oriental Mindoro.
Base sa ulat na nakarating sa Camp Crame, apat sa sugatan ay mga empleyado ng naturang kainan, isa ang delivery boy, at 10 ang hindi pa nakikilala.
Nagtamo din ng pinsala ang 12 sasakyang nakaparada sa parking lot ng naturang mall dahil sa lakas ng pagsabog na sinasabing dahil umano sa gas leak.
Sa isang statement, tiniyak ni PRO MIMAROPA Regional Director Police Brig. General Joel Doria na under control ang sitwasyon at nakikipagtulungan ang PNP sa Bureau of Fire Protection (BFP) sa pag-imbestiga sa insidente.
Nanawagan si Doria sa sinumang may impormasyon na makakatulong sa imbestigasyon na makipag-ugnayan sa mga awtoridad. | ulat ni Leo Sarne
