Aabot sa 562 benepisyaryo ng DSWD sa Plaridel, Bulacan ang nagtapos na sa Pantawid Pamilyang Pilipino Program o 4Ps.
Pinangunahan ni DSWD Sec. Rex Gatchalian at Plaridel Mayor Jocell Aimee Vistan-Casaje ang Pugay Tagumpay ceremonial graduation ng mga ito sa Don Caesareo San Diego, Brgy. Poblacion, bilang pagkilala sa mga pamilyang natulungan ng ahensya.
Sa kanyang talumpati, binati ni Sec. Gatchalian ang mga pamilyang nakamit na ang self-sufficiency o antas kung saan hindi na sila maituturing na mahirap.
“Kahit saan tayo tumingin umaabot tayo sa part ng programa kung saan ang mga anak ninyo, nakakatapos ng pag-aaral, nakakahanap ng maayos na trabaho,” Secretary Gatchalian.
Kinilala rin nito ang pagsisikap at dedikasyon ng exiting 4Ps households para mai-angat ang kanilang kondisyon sa buhay.
“Ang araw na ito ay selebrasyon dahil sa inyong disiplina, sa inyong pagpupursigi, sa inyong paniniwala na kaya pa nating gawing mas maayos ang ating kinabukasan, iyon ang selebrasyon sa araw na ito. Bibigyan ng pugay ang ating mga 4Ps beneficiaries na ga-graduate dahil naging madali ang mga taong nakalipas,” pahayag ng DSWD chief.
Kasunod nito, tiniyak ng kalihim na may aasahan pa ring tulong ang graduating 4Ps households mula sa mga regional office kabilang ang mga programa gaya ng Sustainable Livelihood Program.
Bukod sa mga nagsipagtapos sa Plaridel, ay mayroon na ring 144,167 benepisyaryo ng 4Ps nationwide ang graduate na rin sa programa. | ulat ni Merry Ann Bastasa
