Natagpuang buhay at nakaposas sa gilid ng daan sa Brgy. San Isidro, Antipolo City, ang nawawalang Chinese na dinukot noong nakaraang buwan sa Pasay City.
Sa ulat ng Antipolo PNP na nakarating sa Camp Crame, kinilala ang biktima na si Hu Guangfu.
Natagpuan siya pasado alas-10 kagabi sa gilid ng national road ng mga barangay tanod, matapos na ibaba ng isang sasakyan.
Sa pamamagitan ng interpreter, inihayag ni Guangfu na siya ay dinukot sa Pasay City ng apat na Pilipino noong gabi ng Mayo 7.
Matapos dukutin, isinakay umano siya sa taxi na naka-piring ang mata at dinala sa hindi malamang lugar kung saan siya binihag hanggang sa pakawalan kagabi.
Iniimbestigahan na ng PNP Anti-Kidnapping Group (AKG) ang insidente. | ulat ni Leo Sarne
