Naisampa na ang kasong murder laban sa 70 anyos na primary suspect sa pagpatay sa isang kasambahay sa Cabantian, Davao na itinapon lang sa gilid ng daan.
Ayon kay Police Major Joenel Pederio, hepe ng Buhangin Police Station, pormal nang naisampa ang kasong murder laban kay Nenita Cepada Pagatpatan na nakita sa CCTV footage na hatak-hatak ang trolley sakay ang bangkay ng biktimang si Shiela Han-ay Lagsaway, 29 anyos na taga Don Marcelino, Davao Occidental.
Maliban sa primary suspek, may ikinokonsidera ring persons of interest ang kapulisan na pinaniniwalaang kasama sa krimen.
Samantala, lumabas sa resulta ng isinagawang otopsiya sa bangkay ng biktima na Cerebral Hemorrhage ang nakitang dahilan ng pagkamatay nito.
Posible umanong ang paghampas sa ulo gamit ang matigas na bagay ang dahilan ng hemorrhage.| ulat ni Sheila Lisondra| RP1 Davao
