Labing walong (18) mga opisyal na pawang third-level officers sa Philippine National Police (PNP), na umano’y pawang sangkot sa iligal na droga ang pinangalanan na.
Kasunod ito ng ginawang pagtanggap ni Pangulong Ferdinand R. Marcos Jr. sa courtesy resignation ng mga ito, base na din sa rekomendasyon ng National Police Commission Ad Hoc Advisory Group na nagsagawa ng imbestigasyon.
Kabilang sa tinanggap na courtesy resignation ng Pangulo ay tatlong one star general at 15 colonels.
Ang mga naturang opisyal sa PNP ay kabilang sa 953 third level officers na naging subject ng imbestigasyon, dahil sa umano’y pagkakadawit sa iligal na droga.
Ang mga opisyal na sinasabing sangkot sa illegal drugs ay patuloy na imo-monitor habang pinoproseso na ang kanilang relief orders.
Ang mga kinauukulan ay agad na itatalaga muna sa Personnel Holding and Accounting Unit na nasa ilalim ng Directorate for Personnel and Records Management. | ulat ni Alvin Baltazar
