Tinututukan ngayon ni Senador Robin Padilla ang sitwasyon ng mga kababayan natin sa Bangsamoro, lalo na sa Sulu, na apektado ng engkwentrong nangyari sa pagitan ng mga tropa ng gobyerno at ni dating Maimbung Vice Mayor Pando Mudjasan.
Si Mudjasan ay nahaharap sa mga patong-patong na kaso ng multiple murder, illegal possession of firearms and explosives, at pag-eempleyo ng mga sibilyan para gawing private armies.
Sinabi ni Padilla na pinakikinggan niya ang lahat ng panig kasama na rin ang panawagan sa kanya ni dating Vice Mayor Mudjasan sa kanyang inilabas na public video.
Gayunpaman, sa ngayon ay ipapaubaya na muna, aniya ng mambabatas, sa mga hakbangin ng ehekutibo at aantabayanan ang patutunguhan ng kanilang aksyon.
Sa lehislatura naman aniya ay may pagkakataon silang magsagawa ng pagdinig in aid of legislation kung kakailanganin.
Kasabay nito ay nanawagan si Padilla ng kahinahunan mula sa lahat ng panig para maiwasan ang karahasan.
Kung maaari naman aniyang madaan sa mapayapang pag-uusap ang isyu ay sana mabigyan ito ng pagkakataon para maiwasan ang karahasan. | ulat ni Nimfa Mae Asuncion
