Hindi rin sang-ayon ang Lawyers for Commuters’ Safety and Protection (LCSP) sa muling inihihirit na fare hike o taas pasahe sa Metro Manila Rail Transit Line 3 (MRT-3)
Ayon kay Atty. Ariel Inton, Presidente ng LCSP, kung maaprubahan ang dagdag-pasahe, magiging dagdag na kalbaryo ito para sa mga pasahero lalo’t karamihan pa naman ng nagko-commute ay mga manggagawa.
Dagdag pa nito, hindi dapat ikatwiran lang ang matagal nang hindi pagpapatupad ng taas-pasahe sa tren dahil kailangang isaalang-alang din ang economic status ng mamamayan.
Kaugnay nito, nanawagan ang LCSP kay Pangulong Ferdinand R. Marcos Jr. na mag-intervene at i-defer na muna ang anumang balak na pagtaas ng pasahe sa MRT-3.
Iminungkahi rin ni Atty. Inton na ikonsidera na lang ang pagdagdag ng subsidiya sa MRT-3 para hindi na ito ipasa pa sa mga commuter.
Una nang sinabi ng Department of Transportation (DOTr) na makatwiran ang petisyon ng MRT-3 dahil sunod-sunod na rin naman ang pagsasaayos at rehabilitasyon sa railways at matagal na rin bago nagkaroon ng pagbabago sa pasahe sa tren. | ulat ni Merry Ann Bastasa
