Hindi na kailangang magbayad ng port fees ang mga barko ng Philippine Navy at mga inimbitahang foreign navy na dadaong sa Subic.
Isa ito sa mga napagkasunduan sa pagpupulong nina Northern Luzon Command (NOLCOM) Commander Lt. Gen. Fernyl Buca at Subic Bay Metropolitan Authority (SBMA) Chairman and Administrator, Jonathan D. Tan sa SBMA kahapon.
Paliwanag ni NOLCOM Public Information Office Chief Maj. Anthony Pueblas, dati nang ipinapatupad ang ganitong patakaran, pero naputol nang mangyari ang pandemya hanggang sa pagpalit ng administrasyon.
Ayon kay Maj. Pueblas, ang pag-waive ng port fees sa mga lokal at dayuhang barkong pandigma ay muling naging epektibo matapos ang pagpupulong ni Lt. Gen. Buca at Administrator Tan.
Sinabi ni Maj. Pueblas, aayusin lang ang koordinasyon ng Phil. Navy sa SBMA para sa pagpasok at paglabas ng mga barko sa SBMA. | ulat ni Leo Sarne
📷: NOLCOM
