Sinampahan na ng kaso si P/Staff Sergeant Harry Gonzaga, ang pulis na nanapak sa dalawang menor-de-edad sa Brgy. 30, Bacolod City.
Physical injuries in relation to violation of Republic Act 7610 ang isinampa ng Bacolod City Police Station 6 sa City Prosecutor’s Office laban sa suspek.
Ayon kay Bacolod City Police Office Director P/Col. Noel Aliño, isinampa ang kaso batay sa testimonya ng mga biktimang menor-de-edad at ng mga nakakita sa insidente.
Bukod pa rito may CCTV footage rin sa lugar kung saan makikita mismo ang pananakit ng suspek sa mga biktima.
Nag-ugat ang insidente matapos tamaan ng mga biktima ng bato ang sasakyan ng suspek. Nangalaiti ang suspek kung saan sinapak at tinuhod nito ang dalawang menor-de-edad.
Sa ngayon, nasa kustodiya ng Negros Occidental Police Provincial Office ang pulis kung saan ito naassign. | ulat ni Paul Tarrosa| RP1 Iloilo
