Nasagip ng mga tauhan ng Philippine Coast Guard (PCG) ang may 41 pasahero gayundin ang siyam na tripolante kabilang na ang kapitan nito, matapos lumubog ang kalahati ng sinasakyan nilang motor banca sa San Antonio, Northern Samar, kahapon.
Batay sa ulat ng PCG, umalis ang MBCA Spirit mula sa Victoria, Northern Samar patungo sana sa bayan ng San Vicente subalit dahil sa malakas na hampas ng alon ay nasira ang unahang bahagi nito.
Agad namang rumesponde ang mga tauhan ng Coast Guard gayundin ang Municipal Disaster Risk Reduction and Management Office (MDRRMO), at pulisya sa bayan ng San Antonio katuwang ang mga lokal na mangingisda.
Agad namang nailipat sa isa pang motor banca na MBCA Leanbe ang mga nasagip at dinala ang mga ito sa bayan ng San Vicente.
May apat ding kinailangang bigyan ng atensyong medikal hanggang sa dumating ang doktor at nasa ligtas nang kalagayan sa ngayon.
Samantala, nahatak na rin ang bahagyang lumubog na motor banca patungo sa bayan ng San Antonio. | ulat ni Jaymark Dagala
📸: PCG
