Inanunsyo ngayon ng pamunuan ng Light Rail Transit Authority o LRTA na maghahandog ng libreng sakay ang LRT Line 2 para sa mga personalidad na gaganap ng mahalagang tungkulin na may kinalaman sa FIBA World Cup.
Ito’y bilang pagsuporta ng LRTA sa Phlippine Sports Commisson o PSC sa prestihiyosong palaro na magbubukas ngayong araw, Agosto 25 na tatagal hanggang September 10.
Simula ngayong araw, libreng makasasakay sa LRT 2 ang mga atleta, coach, miyembro ng organizing committee, volunteers, mga tauhan ng safety and security gayundin ang mga media na magco-cover sa event.
Gayunman, sinabi ng LRTA na ang libreng sakay sa mga nabanggit ay kanilang ipagkakaloob kahit tapos na ang torneo o hanggang Setyembre 12.
Kinakailangan lamang ipakita ng mga gaganap sa tungkulin sa FIBA ang kanilang accreditation pass upang makakuha ng libreng sakay. | ulat ni Jaymark Dagala
