Idineklara ng 40 miyembro ng KADAMAY o Kalipunan ng Damayang Mahihirap sa Bulacan ang kanilang pagtiwalag sa ‘front organization’ ng kilusang komunista sa Barangay Siling Bata, Pandi, Bulacan.
Sa seremonyang pinangunahan ng Northern Luzon Command (NOLCOM) kahapon, itinakwil ng grupo ang kilusang komunista sa pamamagitan ng pagsunog sa bandila ng CPP-NPA at bandera ng KADAMAY, kasunod ng panunumpa ng katapatan sa pamahalaan.
Ang aktibidad ay isinagawa kasabay ng pagdiriwang ng “National Peace Conciousness Month” na may temang “Kapayapaan ay Responsibilidad ng bawat Mamamayan”.
Ang 40 nagbalik-loob ay kabilang sa grupo ng KADAMAY na nag-take over sa pabahay ng gobyerno sa Barangay Siling Bata.
Sila ay lumipat sa grupong Samahan ng Malayang Kapatiran Para sa Kapayapaan (SAMAKKA), na kinabibilangan ng mga dating miyembro ng KADAMAY na itinatag ng Regional Task Force to End the Local Communist Armed Conflict (RTF ELCAC) 3 noong Oktubre 2020.
Sinabi ni Northern Luzon (NOLCOM) Commander Lt. General Fernyl Buca na ang pagbabalik-loob ng mga dating miyembro ng KADAMAY ay patunay na maaring makamit ang kapayapaan at progreso sa pamamagitan ng demokratiko at ingklusibong pamamaraan. | ulat ni Leo Sarne
📷: NOLCOM
