Nasabat ng mga awtoridad mula sa isang high-value individual ang aabot sa P680,000 o katumbas ng 100 gramo ng hinihinalang shabu matapos magsagawa ng buy-bust operation ang Parañaque City Police Station Drug Enforcement Unit (SDEU) sa Barangay San Isidro, Parañaque.
Kinilala ang suspect bilang si Nasrudin Ayob Libas alias “Camsa”, 33 taong gulang. Sa operasyon na isinagawa sa Filipinas Ave, UPS 5, Brgy. San Isidro, Parañaque City, nakuha sa suspek ang hinihinalang iligal na droga kasama ang P1,000 buy-bust money at asul na coin purse.
Nagkataon ding nahuli ang suspek isang araw bago ang mismong kaarawan nito ngayong araw.
Agad din namang dinala ang suspek sa Parañaque City Police Station kung saan nahaharap ito sa paglabag sa Section 5 at Section 11, Article 2 ng Republic Act 9165 o ang Comprehensive Dangerous Drugs Act of 2002.| ulat ni EJ Lazaro
