Inalerto ni Bureau of Corrections o BuCor Director General Gregorio Pio Catapang Jr. ang mga opisyal ng Sablayan Prison and Penal Farm sa Occidental Mindoro.
Sa isang pahayag, binilinan ni Catapang ang mga opisyal nito sa nasabing penal farm na maging mapagmatyag at bantayan ang galaw ng kanilang mga Person Deprived of Liberty o PDLs.
Ayon kay Catapang, may nakarating sa kaniyang ulat na may niluluto umanong kilos-protesta ang mga PDL at nangangalap ng pirma sa mga kapwa preso para maghain ng petisyong maibalik sila sa New Bilibid Prisons o NBP sa Muntinlupa City.
Nabatid na inilipat sa Sablayan Prison Farm ang daan-daang high profile inmate at drug lord mula sa NBP kabilang na ang nasa 171 Chinese national na nahatulan dahil sa kasong may kinalaman sa iligal na droga.
Sinabi ni Catapang, wala kasing signal ng telekomunikasyon sa Sablayan kaya’t hirap silang magpatuloy sa iligal na gawain kaya’t sinusuhulan ng mga ito ang ilang prison guard para magpuslit ng satellite phone.
Magugunitang inilipat ng BuCor ang mga high profile inmate mula NBP sa iba’t ibang prison farm sa bansa upang i-decongest o mapaluwag ito at mapigilan ang kanilang iligal na gawain. | ulat ni Jaymark Dagala
