Inaprubahan na ang ordinansa ng Konseho ng Maynila na nagbabawal sa mga pasahero ng jeep at iba pang pampublikong sasakyan ang nakasabit.
Ang City Ordinance 9003 o Bawal-sabit on public utility vehicle ordinance, ay inihain ni Manila First District Councilor Martin “Marjun” Isidro, Jr. noong Nobyembre 9, 2023 at agad itong pinagtibay ng Konseho kahapon.
Sa ilalim ng ordinansa, mahigpit nang ipinagbabawal ang pagsabit ng mga pasahero sa mga tricycle, jeepney, at katulad na sasakyan na lagpas sa seating capacity.
Tanging lagda na lamang ni Mayor Honey Lacuna at paglalathala sa dalawang pahayagaan ang kailangan ng lokal na sirkulasyon, para maging epektibo ang ordinansa makalipas ang 15 araw.
Kasama rin sa mga ipinagbabawal ay ang paghawak ng mga nakabisikleta o rollerblades sa mga jeep para mabilis silang nahahatak.
Papatawan ng ₱500 multa ang mga lalabag na driver, konduktor, at pasahero sa unang paglabag; habang ₱1,500 sa ikalawang paglabag; at ₱3,000 para sa ikatlong paglabag at posibleng makulong ng hindi lalagpas sa isang buwan. | ulat ni Michael Rogas
