Inalis na ng Senate Committee on Public Order and Dangerous Drugs ang contempt order laban sa apat na lider ng Socorro Bayanihan Services Inc (SBSI) kabilang ang sinasabing lider ng grupo na si Jey Rence Quilario alyas Senior Agila.
Kabilang pa sa mga kasama ni Senyor Agila na inalisan na ng contempt order ay sina Mamerto Galanida, Janeth Ajoc at Karren Sanico.
Itinurn-over na sa NBI ang apat at ang siyam na iba pang SBSI members kasunod ng warrant of arrest na inilabas laban sa kanila.
Matapos sumailalim sa physical check-up, ay inilabas na ng Senate building ang 13 kung saan sila binasahan ng miranda rights at saka pinosasan ng NBI.
Dadalhin ang labing tatlo sa building 14 ng NBI facility sa Bilibid.
Una dito sa naging pagdinig ng Senate panel, sinabi ni DOJ Undersecretary Nicholas Felix Ty na ngayong umaga lang inilabas ng judge sa kaso ang warrant of arrest laban sa labing tatlong respondent sa kaso.
Kabilang sa mga kasong kakaharapin nila ay 9 counts ng qualified trafficking in persons na non-bailable; 8 counts ng child abuse; at 4 counts ng kasong may kaugnayan sa child marriage.
Sa ngayon, dahil nasa Surigao del Norte ang kaso ay may petisyon na ring inihain sa Korte Suprema na ilipat sa Manila ang paglilitis sa kaso.
Ayon sa prosecution, ito ay dahil nangangamba kasi ang mga witness sa kanilang buhay at kaligtasan. | ulat ni Nimfa Mae Asuncion
