Malugod na tinanggap ng United States Embassy sa Manila ang mabilis na aksyon ng pamahalaan para maresolba ang pagpatay sa broadcaster na si Juan Jumalon.
Sa isang statement, tinukoy ng embahada ang mga hakbang na ginawa ni Pangulong Ferdinand R. Marcos Jr., Department of the Interior and Local Government (DILG) Secretary Benjamin Abalos Jr., at Philippine Law Enforcement Agencies upang mapanagot sa hustisya ang mga salarin.
Giit ng Embahada, ang malayang pamamahayag ay “fundamental” sa isang malayang lipunan, at ang pag-atake sa mga mamamahayag ay banta sa kalayaan.
Kasabay nito, nagpahayag ng pakikidalamhati ang Embahada sa mga mahal sa buhay ni Jumalon.
Si Jumalon, na broadcaster ng 94.7 Calamba Golf FM ay binaril at napatay ng gunman habang nagpoprograma ng live sa radio booth sa loob ng kanyang bahay sa Calamba, Misamis Occidental nitong Linggo ng umaga. | ulat ni Leo Sarne
