Muling nagpatupad ng balasahan sa hanay ng mga opisyal ng Philippine National Police, halos isang linggo matapos mapalawig ang termino ni PNP Chief, P/Gen. Benjamin Acorda Jr.
Ito ay ayon sa inilabas na kautusan ni Acorda na pirmado ni Directorate for Personnel and Records Management Chief, P/MGen. Robert Rodriguez.
Batay sa dokumentong nakuha ng Radyo Pilipinas, itinalaga ng PNP Chief si P/BGen. Andre Dizon bilang Acting Director ng Police Regional Office 5 o Bicol PNP.
Pinalitan ni Dizon si P/BGen. Westrimundo Obinque na itinalaga naman bilang Acting Chief ng Directorate for Research and Development.
Samantala, papalit naman kay Dizon sa PNP Retirement and Benefits Administration Service si P/Col. Leon Victor Rosete.
Nakasaad pa sa General Orders ng PNP Chief na epektibo ang panibagong balasahan sa hanay ng mga opisyal ng pulisya sa Lunes, Disyembre 11. | ulat ni Jaymark Dagala
