Apat ang kumpirmadong nasawi sa nangyaring pagsabog at sunog sa pabrika ng Paputok sa Cabuyao, Laguna kahapon,Pebrero 1.
Sa ulat ng Police Regional Office (PRO 4A) na nakarating sa Camp Crame, nangyari ang pagsabog sa Diamond Fireworks Inc. sa Lebrilla-Aquino, Purok 3 Brgy. Bigaa, Cabuyao City, Laguna bandang alas-3 ng hapon kahapon, na nagresulta sa sunog.
Agad rumesponde ang Cabuyao Component City Police Station, Cabuyao CDRRMO at Bureau of Fire Protection (BFP) Cabuyao at idineklarang fire-out bandang 5:47 ng hapon.
Narekober sa lugar na pinangyarihan ng pagsabog ang dalawang biktima na wala nang buhay, habang isinugod sa pagamutan ang mga sugatan sa insidente.
Ayon kay PRO 4A Spokesperson Police Lt. Col. Chit Gaoiran, mula sa dalawang inisyal na nasawi sa insidente, naging apat na ito matapos bawian ng buhay ang dalawang malubhang nasugatan.
Patuloy naman ang imbestigasyon ng mga pulis sa pangyayari. | ulat ni Leo Sarne